ຄວາມໝາຍ ແລະ ຄວາມສຳຄັນໃນການຈັດການ
ການລວມຕົວກັນເປັນປະຊາຄົມເສດຖະກິດອາຊຽນ (ASEAN
Economic Community : AEC) ຂອງ 10
ປະເທດຈະເຮັດໃຫ້ປະເທດສະມາຊິກທັງໝົດເປັນຕະຫຼາດ ແລະ ຖານການຜະລິດດຽວ ຊຶ່ງນັບເປັນຈຸດປ່ຽນທີ່ສຳຄັນຂອງເສດຖະກິດ
ແລະ ທຸລະກິດຂອງລາວ ເຮັດໃຫ້ການບໍລິຫານທຸລະກິດ ຫຼື ການບໍລິຫານອົງກອນມີຄວາມຫຍຸ້ງຍາກຊັບຊ້ອນຫຼາຍຂຶ້ນ
ໂດຍຕ້ອງນຳເທກໂນໂລຢີໃໝ່ໆ ເຂົ້າມາຊ່ວຍໃນການບໍລິຫານ ທັງຕ້ອງຜະເຊີນກັບການຜັນຜວນຂອງເສດຖະກິດຢູ່ຕະຫຼອດເວລາບໍ່ວ່າຈະເປັນການກີດກັນທາງການຄ້າ
ຫຼື ການມີຄູ່ແຂ່ງເພີ່ມຂຶ້ນ ໂດຍລະບົບການຄ້າເສລີ ຫຼື ການເຄື່ອນຢ້າຍແຮງງານຝີມືຢ່າງເສລີ
ເຮັດໃຫ້ຜູ້ບໍລິຫານຈຳເປັນຕ້ອງຫາວິທີການເພື່ອຈະບໍລິຫານ ຫຼື ຈັດການກັບອົງກອນໃຫ້ດຳເນີນງານບັນລຸວັດຖຸປະສົງທີ່ວາງໄວ້
ດັ່ງນັ້ນການຈັດການຈຶ່ງເປັນສິ່ງສຳຄັນຕໍ່ການບໍລິຫານ ເພາະຖ້າຫາກມີການຈັດການອົງກອນທີ່ດີຈະເຮັດໃຫ້ອົງນັ້ນປະສົບຜົນສຳເລັດໄປຕາມເປົ້າທີ່ໄວ້.
1.1.ຄວາມໝາຍຂອງການຈັດການ.
ການບໍລິຫານ
ແລະ ການຈັດການ ໝາຍເຖິງ ກິດຈະກຳໃນການບໍລິຫານກ່າວວ່າ ໃນການປະຕິບັດໝ້າທີ່ໃນດ້ານການຈັດການນັ້ນ
ບົດບາດໝ້າທີ່ຂອງນັກບໍລິຫານ ຫຼື ຫົວໜ້າງານທຸກຄົນຕ່າງຮັບຜິດຊອບໃນພາລະກິດທີ່ສຳຄັນ
3 ປະການດັ່ງນີ້:
1.ຈະຕ້ອງສາມາດເຮັດໃຫ້ງານຕ່າງໆ
ຂອງກຸ່ມສຳເລັດດດ້ວຍດີ.
2.ຈະເຮັດໂດຍວິທີໃຫ້ຄົນອື່ນ
ຄືລູກນ້ອງ ຫຼື ຜູ້ໃຕ້ບັງຄັບບັນຊາເປັນຜູ້ເຮັດ.
3.ຈະເປັນຜູ້ເຮັດໝ້າທີ່ປະສານການເຮັດວຽກງານຂອງທຸກຝ່າຍໃຫ້ເຂົ້າກັນໄດ້.
ທ່ານ ບັນຈົ່ງ ອິນຕິກຸນ ໃຫ້ຄວາມໝາຍວ່າ ການຈັດການ
ຫຼື ການບໍລິຫານ ແມ່ນການໃຊ້ຊັບພະຍາກອນຕ່າງໆ ເພື່ອໃຫ້ເກີດຜົນງານຕາມວັດຖຸປະສົງຂອງອົງກອນ.
ທ່ານ ສົມຄິດ ບາງໂມ ໃຫ້ຄວາມໝາຍວ່າ ການຈັດການ ແມ່ນສິນປະໃນການໃຊ້ຄົນ
ເງິນ ວັດຖຸ ອຸປະກອນຂອງອົງກອນ ແລະ ນອກອົງກອນ ເພື່ອໃຫ້ບັນລຸວັດຖຸປະສົງຂອງອົງກອນຢ່າງມີປະສິດທິພາບຈາກທີ່ກ່າວມາຈະເຫັນວ່າ
ການຈັດການ (Management) ມີບົດບາດຕໍ່ການບໍລິຫານງານຂອງຜູ້ບໍລິຫານບໍ່ວ່າຈະເປັນຜູ້ບໍລິຫານລະດັບສູງ
ກາງ ຫຼື ຕົ້ນ ທີ່ຕ້ອງປະສານງານລະຫວ່າງບຸກຄົນ ຫຼື ກຸ່ມບຸກຄົນ ໃຫ້ດຳເນີນງານໄປຕາມນະໂຍບາຍພາຍໃນຂອບເຂດທີ່ກຳນົດ
ໂດຍໃຊ້ຊັບພະຍາທີ່ມີຢູ່ໃຫ້ສຳເລັດຕາມວັດຖຸປະສົງທີ່ວາງໄວ້.
1.2.ຄວາມສຳຄັນຂອງການຈັດການ.
ໃນອະດີດການດຳເນີນງານຈະອາໄສຄວາມເປັນຈິງ
ຫຼື ປະສົບການຂອງຜູ້ບໍລິຫານທີ່ມີຄວາມຮູ້ຄວາມຊຳນານໃນດ້ານໃດດ້ານໜຶ່ງ ດັ່ງນັ້ນຫາກມີບັນຫາໃນດ້ານທີ່ຕົນເອງບໍ່ຊຳນານ
ກໍເຮັດໃຫ້ບໍ່ສາມາດແກ້ບັນຫາທີ່ເກີດຂື້ນໄດ້ ເພາະການດຳເນີນງານບໍ່ມີການຈັດການທີ່ເປັນລະບົບ
ເຮັດໃຫ້ບໍ່ຮູ້ວ່າຜະລິດຕະພັນຊິ້ນໜຶ່ງນັ້ນໃນລະບົບການຜະລິດຄວນໃຊ້ເວລາເທົ່າໃດ
ຊຶ່ງອາດຈະໃຊ້ເວລາຫຼາຍໄປ ແຕ່ຜູ້ບໍລິຫານບໍ່ຮູ້ວ່າເປັນຫຍັງຈຶ່ງຕ້ອງໃຊ້ເວລາຫຼາຍ
ແລະຄວນຈະແກ້ໄຂແນວໃດເພື່ອໃຫ້ໃຊ້ເວລານ້ອຍລົງ ໃນນີ້ອາດມີຄວາມເຂົ້າໃຈທີ່ບໍ່ຖືກຕ້ອງກ່ຽວກັບການຈັດການວ່າຄົງບໍ່ມີຫຍັງຫຼາຍ
ບໍ່ຈຳເປັນຕ້ອງສຶກສາກໍໄດ້ ແຕ່ໃນປະຈຸບັນເປັນທີ່ຍອມຮັບກັນວ່າ ການຈັດການເປັນກິດຈະກຳທີ່ມີຄວາມສຳຄັນຫຼາຍຕໍ່ອົງກອນ
ເພາະຖ້າຫາກມີການຈັດການຢ່າງເປັນລະບົບແລ້ວ ຄວນເຮັດໃຫ້ອົງກອນມີຜົນຜະລິດທີ່ສູງຂຶ້ນ
ມີມາດຕະຖານເປັນທີ່ຍອມຮັບຂອງຕະຫຼາດ ສາມາດລຸດຕົ້ນທຶນຕ່າງໆ ລົງເປັນການເພີ່ມກຳໄລໃຫ້ກັບອົງກອນ
ໃນນີ້ຫາກອົງກອນໃດມີການຈັດການເປັນລະບົບທີ່ດີ ມີຂັ້ນຕອນທີ່ໄຫຼລື່ນບໍ່ຕິດຂັດ
ກໍສາມາດນຳຊັບພະຍາກອນ ທີ່ມີຢູ່ມາໃຊ້ຢ່າງມີປະສິດທິພາບ ແລະ ເຮັດໃຫ້ເກີດປະໂຫຍດສູງສຸດຕໍ່ອົງກອນໄດ້
ກໍຄວນເຮັດໃຫ້ອົງກອນ ນັ້ນບັນລຸເປົ້າໝາຍທີ່ວາງໄວ້ ອີກທັງໃນປະຈຸບັນອົງກອນ
ມີຄວາມສະລັບຊັບຊ້ອນຫຼາຍຂຶ້ນ ຜູ້ບໍລິຫານຈຶ່ງຈຳເປັນຕ້ອງຈັດລະບົບການຈັດການໃຫ້ມີປະສິດທິພາບເພື່ອລຸດຊ່ອງອັດຮອຍຮົ່ວ
ທີ່ຈະເກີດຂຶ້ນຈາກຂະບວນການຜະລິດ ຫຼື ຈາກການບໍລິຫານການຕະຫຼາດ ຊຶ່ງເຮັດໃຫ້ເກີດການສູຍເສຍຊັບພະຍາກອນ
ຢ່າງບໍ່ໜ້າຈະຕ້ອງສູຍເສຍ ດັ່ງນັ້ນການຈັດການຈຶ່ງມີຄວາມສຳຄັນຢ່າງຍິ່ງຕໍ່ອົງກອນ
ແລະ ຜູ້ບໍລິຫານທີ່ຈະຕ້ອງສຶກສາຫາຄວາມຮູ້ເພີ່ມຕະຫຼອດເວລາ ເພື່ອທີ່ຈະໄດ້ແກ້ບັນຫາຕ່າງໆ
ທີ່ອາດຈະເກີດຂຶ້ນກ່ຽວກັບຜົນຜະລິດ ຫຼື ລະບົບການເຮັດວຽກ.
ຄວາມສຳຄັນຂອງການຈັດການສາມາດຊ່ວຍຜູ້ບໍລິຫານໄດ້ດັ່ງນີ້:
1.ປະຢັດໃນດ້ານຕ່າງໆ ເຊັ່ນ: ເງິນ, ວັດຖຸອຸປະກອນ, ເວລາ, ຄ່າໃຊ້ຈ່າຍອື່ນໆ.
2.ເກີດປະສິດທິພາບໃນການເຮັດວຽກ.
3.ເກີດປະສິດທິຜົນຂອງງານ.
4.ເກີດຄວາມເປັນທຳໃນການປະເມີນຜົນການເຮັດວຽກ.
5.ເກີດຂວັນ ແລະ ກຳລັງໃຈໃນການເຮັດວຽກ.
1.3.ບົດບາດ ແລະ
ໝ້າທີຂອງນັກບໍລິຫານ.
ນັກບໍລິຫານ (Manager)
ແມ່ນຜູ້ທີ່ໃຊ້ຊັບພະຍາກອນຕ່າງໆ ທີ່ມີຢູ່ບໍ່ວ່າຈະເປັນຄົນ
ເງິນ ວັດຖຸອຸປະກອນ ທີ່ມີຢູ່ໃຫ້ມຸ້ງໄປສູ່ວັດຖຸປະສົງ ແລະ
ເປົ້າໝາຍທີ່ວາງໄວ້ ໂດຍອາໄສບຸກຄົນອື່ນເປັນຜູ້ທີ່ເຮັດວຽກໃຫ້ ຊຶ່ງນັກບໍລິຫານຈະຕ້ອງມີຄຸນສົມບັດ
ແລະ ທັກສະທີ່ດີໃນການຈັດການ.
ນັກບໍລິຫານ ໂດຍທົ່ວໄປຈະແບ່ງອອກເປັນ 3 ລະດັບ ດັ່ງນີ້:
1.ຜູ້ບໍລິຫານລະດັບສູງ
(Top
Management ຫຼື Executives) ເຊັ່ນ: ປະທານກຳມະການຜູ້ຈັດການໃຫຍ່ ຜູ້ຈັດການອາວຸໂສ, ກຳມະການຜູ້ຈັດການ.
2.ຜູ້ບໍລິຫານລະດັບກາງ
(Middle
Management ຫຼື Managers) ເຊັ່ນ: ຜູ້ຈັດການໂຮງງານ ແລະ ຜູ້ຈັດການຝ່າຍ.
3.ຜູ້ບໍລິຫານລະດັບຕົ້ນ
(Supervisors) ເຊັ່ນ: ຫົວໜ້າງານ, ຫົວໜ້າພະແນກ.
ຜູ້ບໍລິຫານຄວນມີຄຸນສົມບັດ ດັ່ງຕໍ່ໄປນີ້:
1.ເປັນຜູ້ທີ່ມີຄວາມຄິດກວ້າງໄກ
ສາມາດວິເຄາະສະຖານນະການຕ່າງໆ ໄດ້ຊັດເຈນ.
2.ເປັນຜູ້ນຳທັງດ້ານຄວາມຄິດ
ແລະ ການກະທຳໃນດ້ານຕ່າງໆ.
3.ເປັນຜູ້ທີ່ມີການຕັດສິນໃຈທີ່ດີໃນການໃຊ້ຊັບພະຍາກອບທີ່ມີຢູ່
ຫຼື ການຕັດສິນໃຈໃນການແກ້ບັນຫາຕ່າງໆ.
4.ເປັນຜູ້ປະສານງານທີ່ດີ
ມີມະນຸດສຳພັນຕໍ່ຜູ້ຮ່ວມງານ.
5.ເປັນຜູ້ທີ່ສາມາດຈູງໃຈ
ແລະ ສ້າງຄວາມສາມັກຄີໃຫ້ກັບຜູ້ຮ່ວມງານ.
6.ເປັນຜູ້ທີ່ມີຄວາມຍຸດຕິທຳ
ໂດຍໃຫ້ຄວາມຍຸດຕິທຳຕໍ່ຜູ້ໃຕ້ບັງຄັບບັນຊາເທົ່າທຽມກັນ.
7.ເປັນຜູ້ທີ່ມີຄວາມສາມາດໃນການຕິດຕໍ່ສື່ສານໃນການຮັບຮູ້
ແລະ ເຂົ້າໃຈການຕິດຕໍ່ສື່ສານ ໃນການຮັບຮູ້ ແລະ
ເຂົ້າໃຈການຕິດຕໍ່ສື່ສານກັບບຸກຄົນ.
ນອກຈາກຄຸນສົມບັດທີ່ກ່າວມາຂ້າງເທິງນັ້ນແລ້ວ ຜູ້ບໍລິຫານຄວນຈະມີທັກສະໃນການບໍລິຫານ
ຊຶ່ງຜູ້ບໍລິຫານຕ່າງໆ ກໍມີໝ້າທີປະຕິບັດຫຼາຍດ້ານ
ເພື່ອໃຫ້ການດຳເນີນງານໄປສູ່ເປົ້າໝາຍ ແລະ ປະສົບຜົນສຳເລັດ ດັ່ງນັ້ນຜູ້ບໍລິຫານຈຶ່ງຈຳເປັນຕ້ອງມີຄວາມຮູ້
ຄວາມສາມາດ ແລະ
ມີສິນປະໃນການເຮັດໃຫ້ບຸກຄົນອື່ນເຮັດວຽກໃຫ້ເກີດປະໂຫຍດສູງສຸດ ແລະ
ໃນການເຮັດວຽກງານນັ້ນຕ້ອງກົງກັບຄວາມຮູ້ຄວາມສາມາດ ຜູ້ບໍລິຫານຈຶ່ງຈຳເປັນຕ້ອງມີທັກສະ
3 ປະການ ດັ່ງນີ້:
1.ທັກສະດ້ານເທກນິກ
(Technical Skills)
ໝາຍເຖິງ ມີຄວາມຊຳນານໃນເລື່ອງກ່ຽວກັບການໃຊ້ເຄື່ອງມື
ອຸປະກອນ ວິທີການຕ່າງໆ ໃນການປະຕິບັດງານປະເພດໃດ ປະເພດໜຶ່ງໂດຍສະເພາະ ທັກສະດ້ານເທກນິກນີ້ຜູ້ບໍລິຫານລະດັບຕົ້ນຄວນຈະມີຫຼາຍກວ່າຜູ້ບໍລິຫານລະດັບສູງ
ຫຼື ລະດັບກາງ.
2.ທັກສະດ້ານຄວາມຄິດ
(Conceptual Skills)
ໝາຍເຖິງ ການມີຄວາມຄິດລິເລີ່ມໃນການວາງແຜນການສັ່ງງານ
ສາມາດວິເຄາະສະຖານນະການຕ່າງໆ ໄດ້ດີ ສາມາດແກ້ບັນຫາຕ່າງໆ ໄດ້ຢ່າງມີປະສິດທິພາບ
ເຂົ້າໃຈຂອບເຂດຂອງງານ ແລະ ຕັດສິນໃຈໄດ້ຢ່າງວ່ອງໄວ ຖືກຕ້ອງ ແມ່ນຢຳ ທັກສະດ້ານນີ້ຜູ້ບໍລິຫານລະດັບສູງມີຄວາມຈຳເປັນຕ້ອງມີຫຼາຍກວ່າຜູ້ບໍລິຫານລະດັບຕົ້ນ
ຫຼື ລະດັບກາງ.
3.ທັກສະດ້ານມະນຸດສຳພັນ
(Human Skitts)
ໝາຍເຖິງ ຄວາມສາມາດໃນການຕິດຕໍ່ສື່ສານ ຫຼື
ການສ້າງຄວາມສຳພັນທີ່ດີ ການສ້າງຄວາມຮູ້ສຶກທີ່ດີ ການສ້າງແຮງຈູງໃຈ ການສ້າງຄວາມສາມັກຄີ
ຄວາມພັກດີຕໍ່ອົງກອນໃຫ້ເກີດຂຶ້ນກັບຜູ້ຮ່ວມງານທັກສະດ້ານມະນຸດສຳພັນນີ້ມີຄວາມຈຳເປັນສຳລັບຜູ້ບໍລິຫານທຸກລະດັບ
ເພາະທັກສະດ້ານນີ້ສາມາດເຮັດໃຫ້ການເຮັດວຽກງານໃນອົງກອນເກີດເອກພາບ ແລະ
ມີຄວາມຮັກສາມັກຄີຕໍ່ກັນ.
ດັ່ງນັ້ນບໍລິຫານຈຶ່ງເປັນຜູ້ເຮັດໝ້າທີ່ຄອຍ
ປະສານງານກັບທຸກຝ່າຍໃຫ້ດຳເນີນງານໄປສູ່ວັດຖຸປະສົງຂອງອົງກອນ
ພ້ອມດ້ວຍການກວດສອບປະສິດທິພາບ ແລະ ປະສິດທິຜົນໃນການດຳເນີນງານວ່າ ໄດ້ບັນລຸຕາມເປົ້າໝາຍທີ່ວາງໄວ້
ຫຼື ບໍ່.
1.4.ຂະບວນການຈັດການ.
ການບໍລິຫານເປັນຂະບວນການສາກົນສຳລັບອົງກອນ
ທຸກປະເພດ ແລະ ທຸກລະດັບ ຊຶ່ງຂະບວນການຈັດການນັບເປັນສິ່ງສຳຄັນຕໍ່ຜູ້ບໍລິຫານທີ່ຈະໃຊ້ຢຶດເປັນຫຼັກໃນການປະຕິບັດງານ
ເພື່ອບັນລຸເປົ້າໝາຍຢ່າງມີປະສິດທິພາບຂະບວນການຈັດການປະກອບດ້ວຍ 5 ຂັ້ນຕອນ ດັ່ງນີ້:
1.ການວາງແຜນ (Planning) ແມ່ນການຄາດການ
ການເຮັດວຽກງານໃນອະນາຄົດວ່າຕ້ອງເຮັດຫຍັງ
ເຮັດແນວໃດ ເພື່ອໃຫ້ການດຳເນີນງານບັນລຸວັດຖຸປະສົງທີ່ວາງໄວ້.
2.ການຈັດອົງກອນ (Organizing) ແມ່ນການຈັດໂຄງສ້າງຂອງອົງກອນ ແບ່ງສ່ວນງານ
ແລະ ຕຳແໜ່ງ ທັງໝົດ ທັງກຳນົດອຳນາດໝ້າທີ່ໄວ້ຢ່າງຊັດເຈນ.
3.ການຈັດບຸກຄົນເຂົ້າເຮັດວຽກ (Staffing) ແມ່ນການຈັດບຸກຄົນເຂົ້າເຮັດວຽກຕາມຕຳແໜ່ງທີ່ໄດ້ກຳນົດໄວ້.
4.ການສັ່ງການ (Directing) ແມ່ນການມອບໝາຍໃຫ້ບຸກຄົນເຮັດວຽກຕາມຄວາມຮັບຜິດຊອບເພື່ອໃຫ້ບັນລຸວັດຖຸປະສົງທີ່ວາງໄວ້.
5.ການຄວບຄຸມ (Controlling) ແມ່ນການຄວບຄຸມການເຮັດວຽກງານຂອງບຸກຄົນໃຫ້ເປັນໄປຕາມມາດຕະຖານລະບຽບຂໍ້ບັງຄັບທີ່ກຳນົດໄວ້
ດັ່ງນັ້ນຜູ້ບໍລິຫານຄວນຈະສຶກສາຂະບວນການຈັດການ
ໃຫ້ຮູ້ເຖິງຂັ້ນຕອນປະຕິບັດຕ່າງໆ
ເພື່ອໃຫ້ການດຳເນີນງານບັນລຸວັດຖຸປະສົງຂອງອົງກອນທີ່ວ່າງໄວ້.
1.5.ຈັນຍາບັນໃນການຈັດການ.
ການບໍລິຫານໃນປະຈຸບັນທີ່ມີການພັດທະນາທາງດ້ານເທກໂນໂລຢີ
ທີ່ເຮັດໃຫ້ຜູ້ບໍລິຫານສາມາດເຂົ້າເຖິງຂໍ້ມູນ ຂ່າວສານຄວາມເຄື່ອນໄຫວໃນດ້ານຕ່າງໆ
ໄດ້ຢ່າງວ່ອງໄວເພື່ອໃຊ້ເປັນເຄື່ອງມືໃນການຊ່ວຍໃຫ້ການບໍລິຫານຈັດການສາມາດເປັນໄປໄດ້ຢ່າງເໝາະສົມ
ແລະ ທັນກັບສະຖານນະການທີ່ປ່ຽນແປງໄດ້ທັນທ່ວງທີ ຂະນະດຽວກັນຜູ້ບໍລິຫານກໍຕ້ອງມີການຈັດການອົງກອນໃນການໃຊ້ງານຊັບພະຍາກອນທີ່ມີຢູ່ຢ່າງຈຳກັດໃຫ້ຄຸ້ມຄ່າ
ແລະ ເກີດປະໂຫຍດຫຼາຍທີ່ສຸດ ຊຶ່ງຊັບພະຍາກອນທີ່ສຳຄັນຂອງອົງກອນກໍຄືບຸກຄະລາກອນ
ເພາະຫາກອົງກອນມີບຸກຄະລາ ກອນທີ່ມີຄວາມຮູ້ຄວາມສາມາດ
ມີຄວາມຊ່ຽວຊານໃນໝ້າທີ່ການງານທີ່ຕົນຮັບຜິດຊອບກໍຈະເກີດຜົນດີີຕໍ່ອົງກອນ
ເຮັດໃຫ້ການເຮັດວຽກງານມີປະສິດທິພາບ ແລະ ເກີດປະສິດທິຜົນບັນລຸວັດຖຸປະສົງຂອງອົງກອນ
ຊຶ່ງການທີ່ຈະເຮັດໃຫ້ບຸກຄະລາກອນ ໃນອົງກອນສາມາດດຳເນີນງານເພື່ອໃຫ້ເປັນໄປຕາມວັດຖຸປະສົງນັ້ນ
ຜູ້ທີ່ມີສ່ວນສຳຄັນໃນການພັກດັນ ຄື ຜູ້ບໍລິຫານ ດັ່ງນັ້ນເພື່ອໃຫ້ການບໍລິຫານຈັດການເປັນໄປດ້ວຍດີຜູ້ບໍລິຫານຄວນຈະຕ້ອງມີຈັນຍາບັນເຈົ້າທຳເປັນຫຼັກໃນການບໍລິຫານຈັດການງານໃນອົງກອນ.
ດັ່ງນັ້ນ ຈັນຍາບັນ ແມ່ນ ການຄິດດີ ປະພຶດດີ ມີສິນທຳ
ເປັນຫຼັກຍຶດໝັນໃນການດຳເນີນງານເພື່ອຜົນປະໂຫຍດຂອງສ່ວນລວມ.
1.5.1.ຄວາມສຳຄັນຂອງຈັນຍາບັນ.
ຈັນຍາບັນເປັນສິ່ງທີ່ນຳຄວາມສຸກ ແລະ ຄວາມຈະເລີນກ້າວໜ້າມາສູ່ອົງກອນເພາະຫາກຜູ້ທີ່ເຮັດວຽກໃນອົງກອນມີຄວາມປະພຶດດີ
ຄິດດີ ປະຕິບັດຕົວຢູ່ໃນກົດລະບຽບທີ່ເປັນມາດຕະຖານກໍຈະເຮັດໃຫ້ອົງກອນນັ້ນມີຄວາມຈະເລີນກ້າວໜ້າດັ່ງນັ້ນ
ຈັນຍາບັນຈຶ່ງມີຄວາມສຳຄັນດັ່ງນີ້:
1.ເຮັດໃຫ້ບຸກຄະລາກອນມີລະບຽບວິໄນ
ອົດທົນ.
2.ເຮັດໃຫ້ບຸກຄະລາກອນ
ຄິດດີ ເຮັດດີ ສ້າງສັນແຕ່ສິ່ງດີ.
3.ເຮັດໃຫ້ການດຳເນີນງານເປັນໄປດ້ວຍຄວາມລາບລື່ນ
ສຸກສະຫງົບ.
4.ເຮັດໃຫ້ເກີດຄວາມສາມັກຄີໃນອົງກອນ.
5.ເຮັດໃຫ້ເກີດຄວາມຊື່ສັດ
ຂະຫຍັນ ມີນ້ຳໃຈ ຊ່ວຍເຫຼືອຊຶ່ງກັນ ແລະ ກັນ.
6.ເຮັດໃຫ້ເກີດປະໂຫຍດຕໍ່ຕົນເອງ
ແລະ ອົງກອນ.
ການມີຈັນຍາບັນສາມາດຊ່ວຍລຸດຄວາມຂັດແຍ້ງ ແລະ
ບັນຫາທີ່ເກິດຂື້ນໃນອົງກອນລົງໄດ້ ເພາະຜູ້ປະຕິບັດງານປະພຶດດີ ຄິດດີ ເຮັດດີ
ມີນ້ຳໃຈຕໍ່ກັນ ຊ່ວຍເຫຼືອເກື້ອກູນກັນ ຂະຫຍັນ ຊື່ສັດ ອົດທົນ ຄິດເຖິງແຕ່ປະໂຫຍດຂອງສ່ວນລວມ
ຮ່ວມມືຮ່ວມໃຈກັນປະຕິບັດງານຢ່າງເຕັມຄວາມຮູ້ຄວາມສາມາດຂອງຕົນເອງ ເພື່ອໃຫ້ບັນລຸວັດຖຸປະສົງຂອງອົງກອນ.
1.5.2.ການບໍລິຫານງານຕາມຫຼັກຈັນຍາບັນ.
ການບໍລິຫານງານໃຫ້ປະສົບຜົນສຳເລັດໄດ້ນັ້ນ
ຜູ້ບໍລິຫານຈະຕ້ອງມີຈັນຍາບັນເຈົ້າທຳເປັນຫຼັກຢຶດໃນ
ການຈັດການບັນຫາ ແລະ ອຸປະສັກທີ່ເກິດຂື້ນ ເພື່ອໃຫ້ການດຳເນີນງານເປັນໄປຕາມວັດຖຸປະສົງ
ຜູ້ບໍລິຫານຄວນມີ
ຫຼັກການດັ່ງນີ້:
-
ມີຄວາມຮັບຜິດຊອບ.
-
ມີຄຸນນະທຳ.
-
ມີການປະຢັດ.
-
ມີຄວາມໂປ່ງໃສ.
-
ມີຄວາມເສຍສະຫຼະ
-
ມີຄວາມຍຸດຕິທຳ
-
ມີເມດຕາກະລຸນາ
- ມີຄວາມສາມັກຄີ.
